Microsoft ја пушти првата верзија од Edge за корисниците на Linux.

Оваа верзија е во Dev каналот, што значи дека е повеќе наменета за програмерите, но сите заинтересирани можат да ја инсталираат и да го пробаат новиот прелистувач од Microsoft.

Како што најави при крајот на септември, Microsoft го донесе својот нов Edge прелистувач, направен на основа на Chromium отворениот код, на Linux платформата. Првата достапна верзија уште не е во финална форма, а не е ни бета, туку „Dev“, односно наменета за програмерите и потенцијално може да има повеќе багови и проблеми од стабилните верзии.

Сепак, корисниците можат да ја симнат оваа верзија и да не се програмери, па да го пробаат овој нов прелистувач од Microsoft. Поддржани се Ubuntu, Debian, Fedora и openSUSE, а корисниците ќе може да очекуваат неделни нови верзии, како што е стандардно случајот со Dev верзијата на другите платформи.

Во објавата за достапноста на Edge на Linux, Microsoft објаснува како може да се инсталира прелистувачот, а тоа се прави преку симнување на датотеката од нивната страна, а секако карактеристично за Linux, инсталацијата може да се направи и преку командна линија.

Microsoft Edge сега е достапен на сите платформи, односно на Windows 10, Windows 7, Windows 8.1, macOS, Android, iOS и Linux. Иако Chromium проектот е достапен на Linux, Microsoft сепак се одлучи достапноста да ја остави за подоцна, но кога ќе се земе дека никој и не би очекувал Microsoft производ на Linux, добро е што воопшто го овозможија.

Интересно ќе биде да се види дали Microsoft Edge ќе предизвика некакво внимание од страна на Linux корисниците, а посебно поради тоа што овие корисници често преферираат да користат апликации од независни програмери кои од самиот почеток користат отворен код.

0 0 vote
Article Rating

Поврзани вести

Subscribe
Notify of
guest
0 Comments
Inline Feedbacks
View all comments